Jesuh ve Thot ak Pohtha Num? (Did Jesus Peccability or Impeccability?)

Jesuh ve thot poh tha hue(Luka 24:39;Luka 2:52;Mathai 26:38),Thawlh ampoh tha hue(Johan 1:1; Kolosa 2:9; Filipi 2:6,7).

     Ve awidoernak ve John Calvin moe Arminian eng Khawsa awi (Theology)lammoeh ani nang cuhna awm hue.John Calvin eng, “Jesuh ve Khawsa na a awmnak a dawngoeh amthawlh tha rhoe rhoe hue” ti soe Arminian eng toe,“Jesuh ve thlangxing 100% oeh 100% ani lor a dawngoeh thawlh tha hue, thlangxing niinak anih oeh awm soep hue cenamoe amthawlh hue” ti hue.Aningnih ang cuh ce tuhdoena khristiankhi ang lak oeh awicuhna awm huen hue.Ve a kong ve Khawsa awitak lam ak thuemsak matna a awm a dawngoeh amni sim oeh ammang coengtha Khawsa awina awm hue ti ce ni sim hue. John Calvin a ventung num nang dueih, Arminian a ventungna num nang dueih? Acoeh toe Jesuh ak thawlh thai aw, ammak thawlh thai aw?

    Ve awidoetnak ve sim ham rhoe rhoena ak tueng matna awm hue. Anik awidoetnak ve “Jesuh ak thawlh num” tinak amni noeh, Jesuh ak thawlh hlue tha num tinak ni.Ani pakhih eng Khawsa awi Baibul eng a ti Jesuh amthawlh hue ti ce hatlakna hue nih (2 Korin 5:21;1 Piter 2:22). Ace mueihna amma thawlh oehtoe “Jesuh ak thawlh tha aw?” ti ve awidoetnak ak awmlo ni.Thlangvang eng ‘Jesuh amthawlh tha hue’ “impeccability” ti unoeh dueihpuei u soe, thlangvang eng ‘Jesuh thawlh tha hue “peccability” cenamoe amthawlh hue’ ti unoeh dueihpuei hue u.Hoen a huhnak num ak thuem? Khawsa awi Baibul ani congpueinakkhi toe Jesuh ve amthawlh tha hue, thawlh amta tha hue ti ni.Jesuh thawlh tha noeh thawlh a taak mantoe tuhdoena thawlh ta hlue hue. Ace mueihna a thawlh tha oehtoe Khawsa ammingna hlue hue.Anih ve Khawsa-thlang, pumoetna awmnoeh, Khawsa niinak oeh moe thlangxing niinak oeh ak soepna awmnoeh tuhdoena mik eng koeh huh thana ak awm ni.Jesuh thawlh tha hue ti noeh nik cangnak oehtoe Khawsa thawlh tha hue ti noeh nik cangnak moe ang mueihna awm hue. “Khawsa eng Amoeh oehkoe a niinakkhi boeih Anih oeh a soep ce ngaih rhepna hue(Kolosa 1:19)”.Khrih oeh ce Khawsa niinakkhi boeih ce pumsa na awm hue(Kolosa 2:9).

Jesuh oeh Niinak Pakhih – Khawsa moe Thlangxing

    Jesuh a niinak tak ning yaksimnak a hamna toe thlang mat oeh niinak pakhih a niinak ni. Jesuh ve Khawsa moe thlangxing tak ani a dawngoeh a niinak ak thuemtak ce ni teok lah ve u.Jesuh ve Khawsa tak moe thlang takna awm noeh, Khawsa niinak 100% moe thlangxing niinak 100% na awm hue.Khrih eng Khawsa a niinak moe thlang a niinak ce ak cerna nik ching hamna ngah hue.Ace ni simnak ak cam eng Jesuh ak thawlh tha num, ammak thawlh tha num ti ce ang coeina ni sim hlue tha hue.

Jesuh ve Khawsa ni

    Baibun eng Jesuh a konglam ani congpueikhi ni huh oehtoe Jesuh ve thlang yap, Khawsa ak kawngahna ak xing amni noeh,thlangxing Khawsa na ang phloeh lo awm amni hue.Jesuh a niinak tak vetoe Amoeh rhoe ve ak hluengtai soeih Khawsa na awm hue.Tita 2:13 eng a nim mthehkhi toe khristian nini a mueihna “Ngaihunak yawkdo teoknak moe ang xoi Khawsa moe thongkung a boimangnak ang danglo, Khrih Jesuh” ti hue.Khrih a thoh thlahnak a huh oeh, Thomas ak khuenak, “Ka Boipa moe ka Khawsa!”(Johan 20:28).Ace mueih lorna, Hebru cauk eng anim mthehkhi, Pa Khawsa eng Khrih a konglam ak qoen toe: “Cenamoe Capa eng ti hue, ‘Na ngoipeong, O Khawsa, vetoe angrhuina angrhui ni” ti soe awithang laek Johan eng ti ba noeh “Khawsa a tak duen”(Johan 1:18) ti hue.

    Jesuh Khawsa a niinak ve Baibul eng ani congpueinakkhi toe Jesuh eng ve Khawsa niinak ak soep ta hue.Ahoei sim hue(Mathai 16:21; Luka 11:17; Johan 4:29), huen hoei oeh awm hue (Mathai18:20; 28:20; Khuetueih.  18:10), poh thanak a hoei ta hue (Mathai 8:26, 27; 28:18; Johan 11:38-44; Luka7:14-15; Awiphoe 1:8), a xingnak a hamna a uepnak, ang ngangnak ak chang amta hue(Johan 1:4; 14:6; 8:58), a hoei ak khan oeh uk hue (Mathai 28:18; Awiphoe 19:16; 1:5) a kung oehkoe eng awm hamna moe a boetnak ammak awm tha na awm hue(Johan 1:1; 8:58), moe Anih ve anik septa-khikung ni (Kolosa 1:16). Ahoei boeih Amoeh ak cam eng awmlaw noeh, Amoeh a hamna awmnoeh, Amoeh a koena awm hue, ace ce Jesuh ni. Ace a dawngoeh Jesuh ce Khawsa ni.

    Anih (Jesuh) oeh ce Khawsa niinakkhi boeih ce pumsa oeh soep hue(Kolosa 2:9).Anih(Jesuh) a niinak toe Khawsa na awmhla hue, Khawsa moe a ning mueihnak oeh ce dueih hamna amngahnoeh, Amoeh moe amoeh ikoe rhoe na yawm ammak thuum rhoena poek rhu noe”(Filipi 2:6-7). Ace ce u num? Ace ce Khawsa ni(Johan 1:1).

Jesuh Khawsa Capa

    Ave a konglam ning yaksimnak a hamna toe Khrih eng thlangxingna ang coenglonak moe thumkop(Trinity) a niinak a konglam a bet oeh ni teng lah ve u.Thumkop ti oeh ve Khawsa niinak mat, thlangpum pakthum oeh Khawsa matna awm hue tinak ni.Ave mueihna ni ti oeh ve mat mat oeh ni plek noeh a konglam ni teng hamna ngah law hue. Pa ce Capa amni noeh, Muemhla’m Cim awm amni hue. Ace mueih lorna Capa ve Pa amni noeh Muemhla’m Cim awm amni hue.Ace a dawngoeh Muemhla’m Cim ve awm Pa amni noeh Capa awm amni hue ti ce Baibun congpueinak ak thuem soeih ni.Thlang niinak oehtoe pum pakthum law unoeh Ani Khawsa niinak oeh ve matna awm hue. Ace a dawngoeh Khawsa pakthum tinak amni noeh thlang pakthum oeh Khawsa niinak rhip soepna a awm amueihna Khawsa mat tinak ni.Ace Khawsa ani niinak oeh ve ak joi ang xoi tii amawm noeh ang mueih rhipkhina awm hue u.Ace a dawngoeh Pa,Capa moe Muemhla’m Cim pakthum eng ani niinak tak toe Khawsa mat ni.

    Acoeh toe Khawsa Niinak mat oeh thlang pum pakthum ani oehtoe Khrih eng thlangxingna ang coenglonak mue ikoe num ang tuurhunak? Umueih ak thlang num thlangxingna ak awm lo? Mat num? Pakhih num? Ani pakthumna num thlangxingna aning coenglo u?Thlangxingna ak awmlo ve Pa amni noeh Muemhla’m Cim awm amni hue, Capa ni thlangxing pumna angcoeng lo hue tice Baibul awi eng ani congpueinakkhi ni.Ace a dawngoeh Jesuh ve Khawsa ni cenamoe Jesuh ve Pa amni noeh Muemhla’m Cim awm amni hue. Jesuh ve Khawsa Capa ni.
    A takna Khawsa Capa Jesuh eng thlangxing pumna awmlonak ve Johan 1:14 engtoe, “Acoeh Awi ce pumsana coeng lawnoeh ninglak oeh awm hue.A Boimangnak ni huh amueihna,Khawsa venna koe eng ak lo taak duen ak nii ce kueihcahna awmnoeh, lungnak moe awitak eng bae hue”. Avoeh ve “Awi” tingahnak toe Khawsa Capa ni(Johan 1:1;3:16).U eng awm Khawsa ce amhu khoei hue,cenamoe Khawsa mat moe Khawsa venna ak awm, eng ce nim simrhusakkhi hue(Johan 1:18).Awi ve Capa Khawsa ni.Ace a dawngoeh thlang pumna ak awmlo Anih(Jesuh) ve Pa amni noeh Muemhla’m Cim awm amninoeh Capa Khawsa na awm hue.
    Ace mueih lorna Jesuh eng baptisma a huh oeh Pa eng ang coeina ak qoen ce, “Nang ve ka lungnak ka Capa ni, Nang oeh ce kam khue-uep hue”(Luka 3:22).Jesuh ca Khawsa Amoeh a Capa ni ti ce Pa eng ak cerna  qoel hue.Ace hui oeh ni huh toe Muemhla’m Cim ce khyukkhyu amueihna Jesuh ak khan oeh ngoi hue.Ace ni huhnak eng ve Pa, Capa moe Muemhla’m Cim ve ani bi bi moe pum pakthum lawnoeh Khawsa niinak oeh ve mat ni tice nikching tha hue.   
     Voeh ve yaksim hamna ngahnak toe Jesuh ve Capa Khawsa ni ti ni.Ave amning yaksim oehtoe ani thongnakkhi a konglam ve yaksim hamna kuei hue.Ave mueih ammang ning yaksimnak ak cam eng thlangvang eng toe Pa khawsa ni Capa Khawsa na thlang pumna a awmlo hue ti hue u. Ace ce ve thumkop a konglam ammang ning yaksimnak ak cam oehkoe eng ni.Ace mueihna awm soe Capa Khawsa ve Pa, moe Muemhla’m Cim mi ani niinak ang mueihkhi na awm noeh Anih(Capa) ve Khawsa, mdekkhan thlangxing thong hamna thlangpumna ak awmlo ni. Ace a dawngoeh Capa ve Khawsa ni.

Jesuh ve Thlang ni

    Jesuh thlang ni ni ti oeh ve thlangxing a niinak soep hue tinak ni. Ace mueihna thlang a niinak a soepnak ve thlang a thisa oehkoe eng caanak tinak amni hue. A takna toe Jesuh oeh thlangxing niinak soep hue ni ti ve pumsa ta hue(Luka 24:39), Thlang ak kawpoek ta hue(Luka 2:52),thlangxing ang muemhla ta hue (Mathai 26:38). Jesuh ve thlang amueih yap amni noeh, thlang moe ang mueih, thlang a poeknak moe ak kawpoek a mueih a taak yap amni noeh, Amoeh rhoe thlangxing na awmnoeh mdekkhan thlang eng kawpoek ni taak amueihna kawpoek soep ta hue.

    Ace mueihna thlangna awm hue ni ti oeh ve a Khawsa niinak amawm voel noeh    nimoeh amueihna thlang yapna awm hue tinak amni hue.Ace mueihna thlangna a awmlo oeh awm a Khawsa niinak ce Anih(Jesuh) oeh ce soep hue. Thlangxing niinak soep hue ti ve Khawsa a niinak amta voelnoeh thlangna coeng hue tinak amni noeh,thlang eng ni niinakkhi thawlh ti kaana ak changkhi boeih ce Jesuh eng ta hue tinak ni.

    Jesuh thlang a niinak ve Khawsa a niinak amueihna cangnak ham rhoena awm hue.Hubat Johan eng ang coeina a nim mthehkhi toe, “ Khawsa Muemhla ni tii nak chingnak a hamna toe:Jesuh ve Khawsa venna koe eng thlang pumna awmlaw hue tice ak noek ak thlang boeih ni”(1Johan 4:2; 2Johan 7).Jesuh eng thlang a niinak ce thlang oehkoe eng caana awmnoeh, nasen caana koeng ang xoilona awm hue(Luka 2:7;Kalati 4:4).Ace ce ni Poluh eng toe “thlangxing amueihna awm law hue”(Filipi 2:7) ti hue.Thlangna a awmnak ang dangnak toe, Yaa law hue (Johan 4:6), Tui xai hue (Johan 19:28), ak phoen coi hue (Mathai 4:2), moe thlangxing niinak oeh ak thoenglo kawpoekkhi ni huh tha toe,“ngaihkuei hue(Mathai 8:10), qang noeh kawsae hue (Johan 11:35).Mdekkhan oeh ave mueihna xing hue.

Thot Ammakta thlang Jesuh

    Jesuh ve thlang niinak 100% ta moesoenum thot ammak ta thlang mdekkhan oeh a nak awmlo toe Anih doengna awm hue.Jesuh ve thlangna awm moesoenum thawlh amma taak a dawngoeh thot ampoh hue. Ikoe a ti oeh thot ammak ta num ni ti oehtoe thlang thot a thi a saa oehkoe eng ak lo amma niinak a dawngoeh ni.Ace a dawngoeh “…a hoei hoei oeh suekna ak awm thlang mat ni ta hue,nimoehkhi amueihna,-cenamoe thot amta hue”(Hebru 4:15). Thot poh hamna a venna sueknak pha oem loei soe ammak thot thlang toe Jesuh doeng ni. Ikoe ti noeh aw ? Ace mueihna thotnak amma poh ve thot thi sa eng caanak amni noeh,thot niinak kawpoek ve amma taak a dawngoeh thot ammak pohna awm hue.

Qoen Coeinak

     Awidoernak a kung, “Jesuh ve thot ak poh tha num?” ti ve ak choei oeh Jesuh a niinak a konglam ni tengkhi eng ni coeisakkhi ngaih kom. “Jesuh eng ve thot poh tha hue cenamoe ampoh hue” ti moe “Jesuh eng thawlh rhoe rhoe ampoh tha hue” ti ve awilengkahna awmnoeh amni ching phaeng oehtoe Khawsa awitak lam anik xeesak hluekhi matna awm hue.

    Acoeh toe Jesuh thot ak poh thai aw? Thlang boeih eng ni sim cee a mueihna, Vok a caa ce vokna awmnoeh, Ui a caa ce Uina awm hue.Ace mueih lorna thlangthot a caa ce thlangthotna awm hue. Jesuh ve thlangthot a caa amma nii a dawngoeh thot ammak poh thana awm hue.Ace mueih thot a pohnak a hamna toe ang tueipuei thot, Adam a caahlahna awmnoeh, niinak thot ak taa thlang eng ni, a venna sueknak a pha oeh thot pohnak kawpoek ta noeh thotnak a poh hue. Thot niinak ammak ta rhoe, thlangxing(Meri) a pum doeng vatnoeh thlangna ak awmlo, thlangxing thot a thii a saa ammak thuum eng ve thot poh hamna iyah sueknak phalaw soeyawm a hamna phu amta hue.

    Ace a dawngoeh Jesuh eng ve thot ammapoh doeng amni noeh thot rhoe rhoe ampoh tha hue. Thot amma pohnak tha toe ak thotsak tha thot niinak amma taak a dawngoeh ni.Ace mueihna thot niinak amma taaknak ve mdekkhan thlang thi sa ak cam eng thlangna ak awmlo amni noeh, a Khawsa niinak ce thlang a pum(Meri) honak eng ak thanglona a awm a dawngoeh, a Khawsa niinak ce ammahluek, ammarheng a dawngoeh Khawsa ak cim eng thot ampoh tha hue tice Jesuh eng thawlh rhoe rhoe amma pohnak tha eng dangsak hue.

Jesuh ve Khawsa , Ahoeioei ak Simna Awmvik Loeinoeh Iatioeh Angvoei Lonaak Hlue Ammaksim aw?(Mathai 24:36)

“Cenamoe ang huep moe a Nayi ce u eng awm amsim hue, Khanthlang eng awm niseh, Capa eng awm niseh amsim hue, cenamoe Pa doeng engni a sim hue ” (Mathai 24:36; Marka 13:32).

Jesuh ve Khawsa tang aw? Jesuh ve Khawsa, thlangxingna ang coenglona a awm oehtoe iatioeh ang voei lonak hlue ammak sim aw? Khawsa cu a hoei ak sim am aw? A coehtoe, Jesuh ve a hoei amma sim oehtoe Khawsa amni hue. Jesuh ve a Khawsa nak mantoe a hoei sim voei soe!!!

    Vemueih awidoernak ve Jehovah's Witnesses aniti u Watchtower Society eng ak tungna doer hue. Awidoernak ak laek soeih mat ni. Jehovah Witnesses ve 1884 kum oeh Charles Taze Russell (1852-1916) eng am dueih ni. "Aningnikkhi a congpueinak oehtoe Jesuh ve Jehovah eng a seh cuek ni ti hue u"(You Can Live Forever in Paradise on Earth [Live] [Brooklyn: Watchtower Bible and Tract Society of New York, 1982], p. 58).Jesuh ve Mdek khan oeh a lohlan oehtoe khanthlang Michael ni (Reasoning from the Scriptures [Reasoning] [Brooklyn: Watchtower Bible and Tract Society of New York, 1985], p. 218)  ti hue u.
    Jesuh ve Khawsa moe thlangxingna awm hue. Anih ve Khawsa niinak moe thlangxing niinak ta hue. Hebru 2:9 khui oehtoe Jesuh ve"...Khanthlang nakoeh a bet ak nemna taakna awm hue..." tinoeh, Philipi 2:5-8 khui oehtoe Jesuh ve " Amoeh moe Amoeh a yapna ang taarhu, tamna a mueihna saa rhu noeh, thlangxing moe ang mueih nace awm hue..." ti hue. Kolosa 2:9 oehtoe " Anih a pum oehve Khawsa niinak ak soep awm hue" ti hue. Jesuh ve thlangxing niinak 100 moe Khawsa niinak 100 awm hue, Khawsa moe thlang ni. A.D. kum 451 oeh Chalcedon civuei oehkoe Jesuh eng thlangxing a niinak moe Khawsa a niinak awitung toe;" Ammak xe moe ammang sawttha" ti ni.

     Luka engtoe Jesuh eng thlangxing a niinak nim mtheh khinoeh " Jesuh ce pumsa lamna moe cueihnak lamna rhoengtai lo hue, a coehce thlangxing moe Khawsa hai oeh mikhai hlamnak hu hue"( Luka 2:52). Louis Berkhof engtoe," Ve niinak pakhih , Khawsa moe thlangxing niinakkhi,thlang oehkoe thaem , thlang a niinak dangsak hue" ti hue. (Berkhof, L., Systematic Theology, WM. B. Eerdmans Publishing Co.; Grand Rapids, Michigan, 1988, p. 324.) Ve thlangxing a niinak oehve Khawsa a niinak matna a awm oehtoe Jesuh ve a hoei sim hue. Mdek khan oeh a xinghui oeh kapoekkuei them a poh khi moe a hubat khivenna awi ati khi nitoek oeh Khawsa a niinak angcoeina dangsak hue.

    Jesuh ve Khawsa na a awm a dawngoeh thlang ak kawpoek awm sim hue," Iatioh nak ko khuina ak che na poek" (Mat. 9:4). Jesuh eng ak khan oeh ak pha lo hluekhi boeih awm sim hue ( Johan 18:4). Jesuh eng ak cuek oehkoeng uukhi eng num amma nik cangnak u, u eng num ak khong hlue tice sim oepchoeh hoh hlue(Johan 6:64). Tuhoeh cutnoeh,a tuem a pha hlan oeh nim mthehkhi nueng, ace ang dang lo oehtoe, Kaa ce anih nii tice nikcang lona kom ukte( Joh. 13:19). Jesuh eng hailam oeh ak lo hluekhi boeih sim hue, ace a dawngoeh cangnak lamoeh a nimbom khinak a hamna , vemueihna ti hue," Teoklah, a oepchoehna nim mthehkhi nueng" (Mat. 24:25). Jesuh ve Khawsa na awmnoeh a hoei boeih a sim a dawngoeh, ahubatkhi eng vemueihna ti hue u," Tuh oeh a hoeiboeih sim huek te tice sim hue u nueng, awidoet ham ammak ngah kawihna; Khawsa venna koeng nak lo ni tice ni sim u nueng"(Joh. 16:30)tina hue u. Jesuh eng Piter a venna awidoetnak a taak ni huh oeh, Piter a poeknak ak kawkhui nakoe sim hue tice ni hutha hue. Jesuh eng," Simon, Johan a capa, nanik lungna aw? Jesuh eng thumvoei a doet a dawngoeh Piter ak kosae hue,'Na nik lungna aw? A coehce tina hue, Bawipa, a hoeisim huekte; ka ni lungnak awm sim huekte" (Johan 21:17).

    Thlang a poeknak, hailam ak awmlo hluekhi boeih a sim ni huh oehve Jesuh ve Khawsa ni tice ni sim hue. Jesuh eng hailam a tuem ang sut lo hlue thaemkhi a ti moe thlang a poek ang ngahnak a simkhi Baibul cim khui oeh khawyahna ni hu tha hue.
    Thlangxing na yawm awmnoeh Khawsa a niinak eng a hoei ak awm hoh, ak awm hlue thaemkhi moe ang thuk ang dahkhi boeih a sim ni huh oehve Jesuh Khawsa a niinak ang coeina ni hutha hue. Acoehtoe iatioeh ang voei lonak hlue ammak sim aw? U eng awm ace a tuem moe a Nayi ce amsim tha hue, khanthlang eng awm niseh, capa eng awm niseh amsim hue, Pa doeng doeng engni a sim hue (Mathai 24:36;Marka 13:32)ti hue.A hoei simloeinoeh ang voei lonak hlue ammak sim huvoei aw?

    Angvoei lonak hlue ce Jesuh ati mueihna u eng awm amsim hue, Pa doeng engni a sim hue." Jesuh eng vemueih awi ati oehve ang voeilonak hlue a ningyaksak hluekhi kung ce Pa doeng ni. Khrih eng ak thlangxing lam na koe eng awi ati ni( Luka 2:52), a Khawsa niinak oehkoe eng ati amni hue"[Walvoord, John F., and Zuck, Roy B., The Bible Knowledge Commentary, (Wheaton, Illinois: Scripture Press Publications, Inc.) 1983, 1985.] " Pa Khawsa kawngaihnak oeh angpaek rhunak ni ( in submission to the Father’s will)-(cf. John 4:34)."[Walvoord, John F., and Zuck, Roy B., The Bible Knowledge Commentary, (Wheaton, Illinois: Scripture Press Publications, Inc.) 1983, 1985.] A ce mueihna Jesuh eng Pa Khawsa oeh ang paek rhu a dawngoeh Jesuh engve amoeh a ngahyapna , a kawpuehna bi ambi noeh, Pa ak thlah lokung a bibi mueihna ce bibi hue ( Johan 5:19).

    Mdekkhan oeh ni Boipa Jesuh a lonak toe amoeh ak kawngahna kho ak sa hamna ak lo amni hue. Ak tuei lokung Pa Khawsa a ngahnak soepsak hamna ak lo ni. Ace a dawngoeh " Amoeh moe amoeh a yap a mueihna ngairhunoeh (empty himself) , taamna mueiboe nace khosaa hue(nature of a servant) ( Phil.2:7). Khawsa na awmvikloeinoeh taamna a mueihna ang taakrhu , amoeh moe amoeh ii rhoe na yawm ammak thuum amueih tlukna kho a saknakkhi ni huh oeh ak tuei lokung Pa Khawsa a ngahnak soepsak ham ce ang caanak ni tice ni hutha hue. Taamna ce a bawi nak oeh ammang sang amueihna ni Boipa Jesuh awm ak thlah lokung a Pa ak choeina a awm amngah hue. Tuhtoe ni hutha hoh hue, ni Boipa Jesuh ve a moeh a ngahyapna awi amtinoeh bi abi hue, ak tuei lokung Pa Khawsa ak awi ngai hue tice ang coeina ni hutha hue. Vemueihna Pa Khawsa ak kawngahna kho a sak ve Pa Khawsa ak kawngah oeh ang paek rhunak ni (Johan 8:28; 12:49-50; 14:31).

    Ace a dawngoeh ni " Ka Pa doeng engni a sim" a tinak ve Pa ak tuei lokung oeh ang paek rhunak , Pa ak qiihchahnak , Pa ak tuei lokung ak awi ang ngahnak tice Bamlamtung oeh a thih doena Pa Khawsa oeh perhu hue. "Ka Pa nangahnak a mueihna awm hawnseh" (Mat.26:39). Ace mueihna awmsoe ang voei lonak hlue sim hamce capa a bibi hlue amninoeh, Pa Khawsa ak tuei lokung a bi bi ni tice nihutha hue. Ak tuei lokung Pa eng ce a tueihlonak moe angvoei lonak hluekhi ce a bibina awmnoeh sim hue, Capa toe Mdekkhan thlang thong hamna a lo a mueihna a bi bi ce Bamlamtung oeh thih choepna uehnoeh ni thongkhi hue. Ace a dawngoeh ang voei lonak hlue ce khanthlang a bibi awm amni, Mdekkhan thlang a bibi awm amni, Capa a bibi awm amni noeh, ak bibi nakung Pa Khawsa eng a tuem moe a Nayi ce angcoei cana sim hue.

    Angcoei soeih natoe ni Boipa Jesuh eng thihnak noengnoeh a thoh khoenoeh ahubatkhi venna hukhueng awi a nim mthehkhi toe; Ace a tuem atakkhi ce nangnikkhi eng nanisim hamna amngah hue,Pa ak camna awm hue ( by His own authority) ti hue( Khuetueih. 1:7). Ve ni huh oeh ve coeisoeih hoh hue, Pa ak cam ni , Pa amoeh eng poh hoh hue tive Pa Khawsa a bi bi hlue ni , Capa eng vakqoel ham moe angvoei lonak hlue a tuem vateng hlue ce a bibi amni hue tice ni hutha hue.

Ace dawngoeh, ni Boipa Jesuh ang voei lonak hlue ak simkung moe ak bi binakkung toe Pa Khawsa ni, Mdek moe Khan naak awm thlangkhi u eng awm ambi bi na hue tice angcoeina dang hue. Ni Boipa Jesuh angvoei lonak hlue tuem toe Pa Khawsa a bi bina awmnoeh amoeh Pa Khawsa ak cam ni.