Jehoiachin eng Jerusalem a uk oeh Kum 18 (2 Boikhi 24:8) a lo, kum 8 (2 Chonnoernak 36:9) num a lo?

    Veve ang coeina ni huhtha toe kum 8 tive thawlh noeh kum 18 tive ak thuem ni. Kum 8 eng rham uk hue tive ammang coengthana awm hue. Khawsa awi Baibul a long a lam ak thoepkhi engtoe Jehoiachin kum 8 a lo oeh ve a Pa’ng yuengna ukkungna taak hamna a awm a dawngoeh a Pa eng ak uk-hlue( co-regent) na ta oepchoeh hoh hue ti hue u. Ace mueihna a Pa’ng yuengna a uk hlue oeh ce a pa venna uknak a konglamkhi kum 8 oehkoeng toennoeh ikoe mueihnanum khorham a uk hlue tive cong hoh hue tinak ni.Ace mueihna awmnoeh a Pa a thih a mueih oeh a Pa’ng yuengna kum 18 oeh Jerusalem ukkungna ce ngoi hue.

    Ve mueihna Baibul khui oehkoe numbat ak thawlhkhi ve khawyah awm hue. Ni sim ham toe Hebru awina numbat ani yawk u ve a thawlhnak lam pakthumna ni hutha hue. Judah Ca na 5 BC tluk oeh ani yawk utoe sim hamna kuei hue. Ikoe tinoeh num ni ti oehtoe Hebru ca oeh ve Calung BCDFGHJK ti mueih doeng awmnoeh Calungkomnak  a e i o u tive amta unoeh, Vekkhi ( ; : ‘ , .)awm amta  hue u. Calungkomnak ve 800 A.D dengna ani pohna a awm a dawngoeh ace hlan oehkoe Hebru calung ce a boet kaana ani yawk na awm hue.Thlangbaok awina hmueihtehnak;  “NOWHEREGOD” veve thlangvang engtoe, “ Now here God” tinoeh noer hue, thlangvang bai engtoe, “No where God” tinoeh noer soe, thlangvang bai engtoe “Nowhere God” tinoeh noer hue. Ve thlangbaok awi, calungkomnak ak awm pateng yani phunthumna ni noer oehtoe Hebru Ca ve ikoe mueih tlukna num noer hamna kuei noeh moe ak yawkkhi hamna yawk thawlh hamna a yoei hue tice poek hamna awm hue.

    Ace a dawngoeh Baibul ve ak yawk cuek eng ak thuemsoeihna yawk moe soenum, ace teok unoeh ak yawk patoengkhi moe ace ak changkhieng ani yawk patoeng oehtoe yawk thawlhkhi moe calung ani hangkhi khawyah awm hue. Ace a dawngoeh tuh oehkoe thlang eng ni teok oeh nik kawpoekna ni kueisak noeh ni.